Dao wo de redaksie nao 't oetkome van 't liefblaad van de Katers nao 't oetrope van de Prins anger jaore altied op vekansie ging, is t'r noe ein aantal nuuj korrespondente aangenaome die auch nog naogekome berichte oppe site plaatse. Wach mer aaf waat d'r nog allemaol aan sjaele zeiver kump ...
redaksie Klasjeneel
****** leste nuuts ****** leste nuuts ****** leste nuuts ******
-------------------------------------------------------------------------------------
WIE EINE KATER EIN ULEBBREUDJE VINGK
’t Mót gezag waere: net wie de Kater, zorg d’n Uul good veur zien miense. Mer wo de Katerkepel nog röstig veer oer doorgeit, houwt de gemiddelde Ulekepel halverwaege de eige receptie steevast de pin d’r in en kint dan zjwaorbeveiligd achter sjlaot en grendel op ein hotelkamer genete van dieke soep, luxe breudjes kipfilet mit kees, aafgesjlaote mit ein dröpke cognac en ein fijn sigaerke. En det alles in de Oranjerie van Remunj.
Mer waat is det allemaol waerd es se de sjleutel van det kaemerke zo mer in henj gufs van ein nes hongerige Katers? Gaar nieks, netuurlik! Dan moogs se es Uul blie zeen es t’r überhaup nog get greumele veur dich euverblieve. Weg ware de breudjes!
Net zo min es ’t versjtenjig is om es Uul hoog vanoet diene hoteltaore in ein aope raam mit det sigaerke ónger de naas de Kater oet te dage es t’r euveral sjnee ligk. Det is netuurlik vraoge om probleme. Vief sjneebelkes nao de kop en eine rech in de dieke soep - weg waas de soep!
’t Kin neet angers of d’n Uul is zich dae Vastelaoveszunjig van de honger muus gaon vange.
-------------------------------------------------------------------------------------
EINE KATER VAN DE KAJE KANTJ
Op oetneudiging van Ieskeuningin Sanne haet ouch Prins Danny II ’t iesskulpture festival bezóch det in ein grote tent naeve ’t outlet is neergezat. Neet allein de oetneudiging (van de kampiejoen beertappe bie Bachus) waas aanleijing óm te gaon, ouch ein femilielid van oze eige Kater taegeneuver ‘t Betjesplein waas ein gooj raeje óm dit bezeuk in het program op te naeme.
‘t Waas waal ein femilielid van de “kaje kantj” en eine sjaal had Danny II dan ouch neet mitgebrach! De insigste mit ein sjaal ware Danny en zien adjudante, want in de ómgaeving van dit sjtökske Uuleriek waas ‘t ech ozelig! Opmerkelijk waas det Vors Eric zónger sjaal deze kaje vors-temperature good kós höbbe.
Mede door deze kaaj was ’t ouch neet meugelik ein fleske eige gebroewe Katerbeer achter te laote. De fles wo det dit beer inzit kin dao neet taege en zól kepot sjpringe, waat weer sjaaj aan zól kinne richte aan sjitterende prach en praal wo-in deze ieskater, ’t bedoelde femilielid, sjteit opgesjteld.
Ouch eine KlassjeNeel zól ‘t eventuele sjmeltwater neet euverlaeve en dae waerde dan ouch neet aangebaoje.
Det die Uule d’r nieks van sjnappe waerde pienlik dudelik gemaak door te kónsjtatere det ‘t beeld neet good waas neergezat! Eine echte Kater sjteit namelik mit de rök nao de sjtad en mit zien naas oet de windj, richting Neel!
Nao get gesjörg en diplomatiek euverlegk door Vors Eric mit de belanghöbbende waerde de poginge gesjtaak óm het beeld óm te dreije. Het zoot ech vastgevraore en de organisasie verbaoj ‘t, óm ’t beeld perberte óm te dreije. Tiepies geval van Remunsje kaje kook?!
Danny II haet nog same mit zien adjudante gezóch nao Uule, Tuinhagedisse, Kaketoes, Muus en anger vastelaovesbeeste, maar bliekbaar vónje de ieskunstenaars het neet de meuite waerd óm dees ouch in ‘t ies te verewige.
Ein foto mit alle belangrieke miense die op det mement aanwezig ware is toen gemaak en in ein lieske bij Miem en Dre in de kefee achter de bar gezat óm zo toch ein bietje deze kater te kinne ere en veur de ewigheid te kinne behaje! ’t Waas sjoon óm same mit ein aantal anger prinse en netuurlik de sjarmante ieskeuningin dit festival te moge bezeuke, maar geheel in de trant van Danny II ziene liefsjpreuk :
Eine echte Kater belaef se toch heel in os eige Neel!
-------------------------------------------------------------------------------------
ROUKERSRAZZIA IN NEEL
En zo kos 't ongerins gebeure det alle bleik en soda in Neel ram ware oetverkoch. Mit sjörskerre tegeliek waerde 't net veur de Vastelaovend de Boerebondj oetgesjörg en richting Sjter gedrage. 't Vloog droet wie sjneesjöppe en sjtreujzaat bie min 10 gevreur en 20 centimeter sjnee.
Waerde noe eindelik de mit sjmienk versjtopde wastaofel baove bie de Sjter nao 3 keer 11 jaor 'ns te gooj gesjroeb? Nae, netuurlik neet. Wie bekind sjtong rondjóm de jaorwisseling 2009 kefee de Sjter beheurlik blauw - waas 't neet van de rouk dan waas 't waal van ein nuujjaorsbie-einkoms van blauw blezerkes van de plaatselikke VVD.
Minister Ab Klink controleert de glazer op nicotine plekke same mit prins Danny II en Wim Kemp
Wie den ouch, die kefee mos en zól gezuverd waere van de Dieke Luft, meinde CDA-minister Ab (k)Link. Ein razzia van 't Ministerium von Volksgezundheid, perseunlik geleid door häömzelf, kós geweun neet oetblieve. Op woonsdig 10 fibberwari 2010, net veur de Vastelaovend, waas 't dan ech zowied.
Gelökkig kreeg Miem, gewaarsjuwd door ein plaatselikke CDA veurzitter mit ein gooi naas veur dit saort zake, d'r oppertied loch van. Gauw de assebek achter de teek versjtop, `t plefong gewit, de brandjplekke oet de vloerbedekking geknip, Jantje örges weggeduujd en alles, mer dan auch ech alles waerde brand- en brandjzuver gemaak. Mit ontelbare söpkes soda en liters brandjspiritus waerde alle sjpaore gewis. Zelfs de dettol van de EHBO mósde d’r aan geluive.
Drie waeke lang is t'r nog neet ein sigaerke opgesjtaok of sigaret gerouk. Alle roukreuk mósde droet! Om de leste zjweem van nicotine rondj Dré en de klantje te verdrieve haet Miem bie Appels de sjape mit 4711 laeggeruump en in de kefee rondjgesjprenkeld.
Mer ein ongeluk en ein minister komme zelje allein, waas de angs. Om euverlas van allerhandj beesteknoevelaers te veurkomme bakde Miem toet aan ’t Frenzebal allein nog mer greune, vleisloze tofu-burgers. En sjoew veur ein inval van de Bontjbrigade haet 't zelfs De Voes gevraog om veurluipig zien gezich neet meer te laote zeen om verwarring te veurkomme.
Dankzij dees en anger maotregele is alles nog good aafgeloupe.
-------------------------------------------------------------------------------------
BELANGRIEKE TRANSFER IN DE MEZIEK?
Vraog elke prins mit ein eige prinsekepel: nieks is sjoonder om mit die daag mit viefenzestig man aan mötse, vaere, dreunende trom en bulderend kaoper op eine receptie diene waeg nao veure te bane. Edereiiin, oet de waeg! Det is gans get angers dan zingend op ein CD’tje oet de hitpereed nao binne huppele.
Mer Klassjeneel of Zjwetskammezaol, welke vastelaovesgezet se d’r ouch bie paks: ein gooi foto van ein prinsekepel in actie höbse dao al jaore neet meer in gezeen. ’t Is altied net of de Kepel de ganse Vastelaovend d’r neet bie is gewaes.
’t Leep Katervorsitzender Léon Hamans dan ouch kaad euver de rögk wie in ’t Ule-liefblaad euver twee pagina’s en sjtraolende kleure de Prinsekepel van Neel breid-oet oppe foto sjtóng. En neet de Prinsekepel van d’n Uul. Biesjrif: “De neutjes höbbe lekker gesjmaak!” Ich herhaol: “De neutjes höbbe lekker gesjmaak!”. “Absolute geheimtaal!”, volgens Léon.
Waat zól det beteikene, waat veure die Ule in häör vaere? Wille ze mesjiens de Neelder Prinsekepel sjtrikke es hoesorkes oppe receptie in plaats van häör eige PK? Of treujt de Neelder PK dit jaor op oppe Sjtasiefestasie? En wie mót det dan mit de meziek in Neel? Zeen ze bie D´n Uul noe gans gek gewore?
De veurzitter sjoevert, hae mót t’r neet aan dinke. Hae zuch: “Volgend jaor toch mer ouch ein foto van de prinsekepel in de Klassjeneel zètte? Mesjiens hulp det.”
(Bron: Zjwetskammezaol 2010 - Math de Ponti)
-------------------------------------------------------------------------------------
PRINS DANNY II BEZEUK DE KATER
Op zóndig 17 januari brach Prins Danny II same mit zien adjudante ein bezeuk aan de Kater taegeneuver het Betjesplein. Ein paar daag eerder haaj de Kater bie de “reaksies” op de site van de Katers, al van zich laote heure.
De kater kómplementeerde de vereniging met ‘t vinje van eine Prins dae nemes haaj verwach en neudigde Danny II en zien adjuus oet óm zich veur te kómme sjtelle en van dunbie te laote kieke. Same mit zien adjuus noom Danny II dees oetneudiging van herte aan en voogde de daad bie het waord!
Óm neet mit laeg henj te kómme brachte ze ein KlassjeNeel, ein fleske eige gebroewe beer en ein lekkere werme sjaal mit. Nao ein paar wies welkomstwäörd van de Kater en get sjaele zeiver van Danny zien adjuus höbbe die letste de kater ins good euver zien bölke en zien rök geaajd en ‘m dae lekkere werme sjaal ómgedaon zodet d’r mit dae sjnee en de vors van de afgeloupe daag neet teväöl zól lieje en zo ouch ein bietje besjermd waas veur ‘t waer det nog geit kómme!
Vervolges haet Danny zichzellef en zien adjuus veurgesjteld, get euver häör allemaol verteld en de Kater eine KlassjeNeel euverhenjigd wo hae nog meer euver hem en zien adjuus in kós vinje. Oet respek veur de Kater waerde ouch het allereerste fleske eige gebroewe beer aangebaoje oet de partiej die besjtump is veur de Raod en de Kepel.
“Metein oetdrinke” waerde d’r geliek bei gezag, want veural die van de Kepel aoze al ein paar daag op det beer!
Ouch euver det beer en het broewe daovan kint de Kater meer laeze in de KlassjeNeel.
Nao ein paar foto’s en ein letste aaj euver ’t köpke, is het prinselijk kwartet toen vertrokke nao Wim Sillekens dae deze middig ouch in ’t zunke waerde gezat. Wim kreeg als 2x22 jaor- jubelaris ouch ein fleske beer en daobie de eerste van de kepel. De res van de kepel is noe sjtinkend jaloers, maarjao, die zeen dan ouch nog gein 2x22 jaor lid!
Binnekort nog meer nuujts op dit blaad.
