prins

Prins Danny II

Efkes veursjtelle…

Op 6 januari 1983 bön ich gebaore in ‘t zekehoes van Remunj. Ich bön eine zoon van Frans en Clarie Franssen en ein breurke van Tanja Franssen. Mien jóngere jaore höb ich in Hoogvonjere ( aad Neel) doorgebrach. Al vrie snel zeen veer nao de Kesjtele-buurt verhoes. Ich höb op ‘t kinjerdaagverblief in de Donderie gezaete. Daonao nao de basissjool “’t Ankertje Kompas”. Vanoet de basissjool waerde ich toegelaote op Bussjoppelik Kollezje Broekhin in Neel, ich höb dao de eerste 3 jaor HAVO gedaon, maar ómdet ich anger dinger belangrieker vónj bön ich mit ein MAVO diploma op zak nao hoes gegaon. Wie ich van de basissjool aafging wool ich nog sjteeds piloot waere. Maar nao ein tiedje op Broekhin te höbbe gezaete, woor ‘t mich al sjnel dudelijk det dae vleger neet op ging. Toen besjlaot ich maar ’t in de boe te zeuke. Det woor ouch de raeje det ich nao ‘t aafrónje van de middelbare sjool boewkunde bön gaon sjtudere oppe MTS in Remunj. Nao det ich dees opleijing had aafgeróndj bön ich begónne te wirke bie Louis Scheepers. ’t 1e Jaor boete op ‘t steiger en daonao binnen op kentoor es wirkveurbereijer. Ich höb ‘t dao volgehaje toet aafgeloupe zomer. Daonao bön ich begónne es produksieplenner bie Emcon Technologies, oetlaote is weer ‘ns get angers es de boe.

Van kleins aaf aan höb ich altied waal get mit Neel gehad. Es klein menke bön ich ein aantal jaore bie kinjervakansiewerk gewaes in Neel. Det waas altied ein groot fees. Op jónge laeftied bön ich begónne mit meziek make bie de vereniging van de baas van miene pap, de PTT-hermenie. Al sjnel bön ich ’t in ’t Neelse gaon zeuke bie de Autarky Bress Bend en de Fiel. Toet noe toe haaj ich ‘t mit väöl plezeer nog good vol. Sins ein aantal jaore sjtaon ich noe veur de ABB in plaats van mit de träöt oppe stool. Ouch de jeughermenie moog ich aaf en toe dirigere. Naeve de ABB en de Hermenie sjpeel ich sins ein aantal jaore bie Big Band Boesten.

Bie de ABB höb ich mien maedje Ilona lere kinne, ein maedje oet ’t Berggeite-riek. Twee jaor nao det mement begós d’r tösse ós get te bleuje. Wie ós relasie 1 ½ jaor aan de gang waas, höbbe veer ós ein huuske gekoch op Hoogvonjere. Óngertösse zeen veer al 6 jaor biejein en aafgeloupe oktober zeen veer de trotse elders gewaore van oos dochter Yana.

‘t Nuuj sezoen sjteit veur de deur. Ein sezoen wo-in det ich de eer höb óm prins van de Katers te moge zeen. Ouch ich höb netuurlik hulp neudig van adjudante dees daag. Det zeen Frans Franssen, Wim Lowis en Niels Bazelmans. Mit ós vere gaon veer d’r veur zorge det ‘t ein geweldig sezoen waerd. Alles ónger miene liefsjpreuk;


BELAEF ‘T HEEL IN NEEL!!!