de jeugprins

Jeugprins Justinn I

Leef Katers en Ketjes, bie deze sjtel ich mich efkes veur.
Wie van eine jeugprins waerd verwach, bön ich eine richtige Neelder jóng. Ich bön gebaore op 5 september 1998 toes oppe Veldjbrand. Dao bön ich toet noe toe ouch grootgebrach. Miene pap is vanoet Leeve in Neel gaon wone mit mien mam die van Zjwaame kump.
Zo-es geer zeet gaon die van Neel, Leeve en Zjwaame good same. Geer zólt waal dinke woróm waerd Justinn mit twee nn gesjreve. Det kump door miene pap, hae haaj zich versjreve op ‘t stadhoes. Ich zit d’r noe veur altied aan vas.
Es bebie waas ich röstig en kós ich good aete. Det is, noe ich ajer bön nog neet verangerd. Bön eine goje aeter. Veur lekker aete kinse mich wakker make. Het leefs aet ich pudding, det neum ich noe nog sjteeds toeta. ‘t Is jaomer det ze det neet aan mich zuus det ich väöl aet, want ich moog waal ein unske zjwaorder zeen. Mien levelings-bees is de koe. Hie höb geer de verklaoring: ómdet kuuj melk gaeve, en det waerd weer gebroek veur pudding.
Toen ich 2 jaor waas bön ich nao de zösterkes in het klooster van Neel gegaon. Ich haaj ‘t d’r altied nao miene zin. Nao bienao drie jaor allein mit pap en mam gewoond te höbbe waerde mien leef zösterke Charlize gebaore. Toen waas het toes in eine klap gedaon mit de rös.
Nao de kresj mit good gevolg doorloupe te höbbe, bön ich gaon sjtudere op BS. De Sjakel, ein deur verder es de kresj, en dao zit ich noe in groep 7.
Verder höb ich ‘t drök mit vanalles en nog get. Ich bön eine oetvinjer en höb al eine robot, gok-apperaat en eine boot op zónne-enerzjie oetgevónje. Oppe kompjoeter gaon ich döks vlege, ich höb al väöl eksotiese lenj gezeen en ouch al ins een noodlanjing mótte make. Ouch oppe x-box en de wii bön ich eine sjpeler mit klasse, ich höb minnige taegesjtenjers versjlage.
Bie karate-klup Ashi-Te-Hara bön ich eine fanatieke vechter en knokker van dees oosterse sjport en höb ich de oranje bandj. Nao es Esta’s begónne te zeen bie Scouting St. Joris in Neel bön ich noe Verkenner. ‘t Leukste hie aan vinj ich, det veer vanalles moge doon det veer toes neet moge. Veural fikkie sjtaoke vinj ich geweldig óm te doon. Es veer op kamp zeen dan belaeve veer allerlei avonture. Mit touw en tuikes en väöl hout boewe veer ós eige kamp. Dit jaor höbbe veer zelfs in de wei gesjlaope in de boetelóch tösse de sjäöp. Det was waal mekkelijk om in sjlaop te valle, door de sjäöpkes te telle.
De meziek dae bie os toes döks gedreijd waerd is Rock en Roll meziek. Mien eljers zeen gans weg van de jaore 60. De zjoeboks in hoes steit edere daag aan. ‘t Is mich dus mit de paplepel ingegaote en daoróm wil ich Rock en Rolle.
Ein verhaol wil ich nog kwiet. D’r is de letste maonde väöl gebeurd aan de keuketaofel. Dao mós väöl geregeld en geprakkezeerd waere. Veer höbbe d’r ein oplossing veur bedach. ’t Is namelik zo, det mien zösterke neet moogde wete dat ich prins waer. As det d’r bie zoot waerde der allein gekald euver eine snirp. Bedink uch zellef maar waat det beteikent. Mien zösterke vroog waal ins, waat is snirp en toen höbbe veer gezag det det ein heel blie jungske is.

Ich wil d’r eine supersjone vastelaovend mit uch allemaol van make. Dit doon ich neet allein, mer same mit mien adjudante Devi Bessems en Nic Beek en netuurlijk mit alle ketjes en kaeterkes.

Ónger miene liefsjpreuk;

“ Katers krolle, Ketjes Rock ´n Rolle “ !